5 Kelmiet Maltin fl-Oxford English Dictionary 2018-02-17T13:37:46+00:00

Project Description

Fil-Malti għandna viżibilju kliem ġej mill-Ingliż. Imma fejn qatt tobsor li fl-Oxford English Dictionary hemm erba’ kelmiet ġejjin mill-Malti?

 

dghaisa

Ifissruha hekk: “A boat resembling a gondola, used in Malta”.
Jiktbuha dghaisa jew dghajsa jew dhiassa. L-għ ma teżistix. Naħfruhielhom. Imma dhiassa? Bis-serjetà?! Qishom jien meta nkun f’sakra ma narax art u nipprova nibgħat messaġġ fis-2 ta’ filgħodu.

 

karrozzin

“A horse-drawn cab used in Malta.” Fil-ħarġa tal-21 ta’ Jannar 1972 tad-Daily Telegraph and Courier hemm miktub hekk: “They’re horse-drawn ‘karrozzins’, and each one is so beautifully painted you get the feeling all the owners are in earnest competition. Hire one, and go for a ride through Malta’s tiny winding streets, at a good steady trot.” Karrozzins? Huwa minnu li l-Malti għandu l-plural sħiħ u l-plural miksur, però dawn kissruh ta’ veru l-plural.

 

lampuki

“A large marine food fish, Coryphæna hippurus or C. equisetis”. Il-lampuki aħna nsajruhom b’elf mod differenti. Nixwuhom. Naqluhom biz-zalza tal-kappar. Nixħtuhom fl-aljotta. Fit-torti. Fil-pastizzi… U f’ħalq l-Ingliżi.  

 

spitchered

Din il-kelma tal-ġenn! Taf int, il-Maltin ilsienhom ġieli ma jdurilhomx u jgħidulek sangwiċ (sandwich), xikapsover (shock absorber) jew tirrejpja r-rigali (imsieken). U l-Ingliżi xejn aqwa minna. Spitchered tfisser “rendered inoperative, ruined.” Ġejja mill-verb spiċċa! Issa moħħi spiċċut ta’ vera.

 

U l-ħames waħda?

 

pastizz

Din mhix fid-dizzjunarju tal-Ingliż. Imma wasal iż-żmien li jdaħħluha ta. Dejquna jsejħulu cheesecake. Għeżież sinjuri Brittaniċi, intom qatt rajtu cheesecake għamla ta’ rombu tal-għaġina mimli bil-piżelli, bl-irkotta jew bl-inċova u b’nofs litru żejt, li jista’ jirreferi wkoll għall-parti tal-mara u għal xi ħadd rieqed, ċapsu, mejjet ħaj?! Le hux. Mela daħħluha fid-dizzjunarju. U ibdew użawha!

Eh u bilħaqq, il-plural mhux pastizzs.

 

Verżjoni iqsar ta’ dan l-artiklu kienet dehret fis-sit Lovin Malta.

Facebook Comments